KA’I HA JAGUARETE
Compilación de OSCAR ALBERTO CABRERA
Yvyra poguasu rakãre ndajeko mitã Ka'i oguapy po i, okay'u hína. Upe javéje Jaguarete oku'e poh’yĩ ohóvo. Tie’ỹgui rei Ka’i oñeñanduka chupe.
-Moõ piko reho pya'ete rehóvo che irũ Jaguarete -he'i ñembo-hory vai.
-Ko jerérente -ombohovái Jaguarete.
-Ejúna jaka'u raẽ ha upéi tereho.
-Mba'éichapa ajupíta -oporandu Jaguarete.
-Ha emoĩ ne akã yvy gotyyo ha nde reví yvate gotyo ha rejupímareína.
Heta porã oñepia'ã rire Jaguarete ojupi sapy'a. Mbegue katúpe oñemoaĝui ohovo Ka'ígui. Oñembojávo hendápe katu kóva oñemoĩ porã ha... ¡charráu! oñohẽ ytaku hevíre. Jaguarete vaikuépe hi’ambu oúvo yvýpe. Ojapajaréi heta porã rire oñakarapu'a ha tesa rendýpe ongururu:
-Ejererekóke nde tekove chapí, romokóta -he'i jey Jaguarete tuguy raku reheve.
Peteĩ tesapirĩme, Ka'i Jaguarete rye pypema oñeñandu. Kóva, guata pohyi vaípe oipykúi henonderã ojerovu ohóvo.
-Agui rire noñembohorymo'avéima che rehe ko tekove chu'ĩ ≠he’i ojupe ohóvo.
Upeíchahágui oñandúvaicha hesápe omokỹryiva chupe.
-Mba'éiko kóva -oñeporandu.
-Chénteko -oñeñanduka Ka'i.
-Mba’éiko rejapo upépe -oporandu kyhyje vai Jaguarete.
-Mba'eve. Amopotĩnteko ndéve nde resa rehecha porãve hagua -he'i Ka'i.
Pukumi oho jey rire Jaguarete ikyryi jeyma, ko'ága ijurupeháma.
-Mba’éiko rejapo upépe, Ka’i -oporandu jey.
-Mba’eve. Amopotĩnteko ndéve ne rãi rekãru porãve hagua - ombohovái Ka'i.
Oguata sambo sambo jey upémarõ Jaguarete ohóvo ha pya’ete iñangekoi jeyma, ko'ága ijapesapeháma. Pochy reheve oporandu jey Ka’ípe:
-Mba'e aña tiko rejapo upépe.
-Ma'eve, amopotĩnteko ndéve nde apysa rehendu porãve hagua -ochiã Ka'i.
Mitã Ka'i oñandu ramo ivai, oñemokirirĩ puku porã. Aremi rire Jaguarete oñandu jeyma oñandúva. Huguái guy roketépema ko'aga oñeñanduka. Pochy pópe okorõi Ka'ípe:
-Mba'e ahé piko rejapo jeyma hína upépe nde tekove chavĩ. Osenguetévoma Ka'i ombohovái:
-Che rapénteko amopotĩ.
Pya’eko Jaguarete oñembojere ha mitã Ka’ipy'amano manóma hese guajayvi rakã guive.
Fuente: MIEL DE CAÑA. MITOS, LEYENDAS, CREENCIAS, CUENTOS, RELATOS, CASOS, FÁBULAS. ACUARELAS DEL FOLKLORE PARAGUAYO. Compilación OSCAR ALBERTO CABRERA. Distribución y venta LIBROFACIL - Tel.: 0981.968.557. Asunción – Paraguay, 2010 (217 páginas)
GALERÍA DE MITOS Y LEYENDAS DEL PARAGUAY
(Hacer click sobre la imagen)
